Føroyskt tilvísingargenom

Tá tú leitar eftir einum møguligum sjúkuelvandi íleguvarianti, er neyðugt at hava okkurt at samanbera við, so tú kanst meta um, hvørt ein variantur er vanligur ella ikki. Til hetta endamálið brúka granskarar og læknar sonevnd tilvísingargenom. Eitt tilvísingargenom vísir miðal ílegusamansetingina hjá eini búfjøld í einum avmarkaðum øki. Føroyska tilvísingargenomið byggir á genomdátur hjá FarGen-luttakarunum og vísir miðal ílegusamansetingina hjá føroyingum.

Føroyar verða roknaðar sum eitt ílegufrøðiliga avbyrgt øki, og tað er umráðandi, at vit hava okkara egnu tilvísing, tí hon kann víkja frá henni í øðrum londum. Føroyska tilvísingargenomið gevur okkum eitt yvirlit av íleguvariantum og títtleikanum av hesum variantum hjá føroyingum. Tí kann tað brúkast til at leiðbeina, um til ber antin at staðfesta ella útiloka, at ávísir íleguvariantar kunnu elva til sjúku.

Tilvísingargenomið er neyðugt fyri at skilja íkastið hjá ílegunum til sjúku hjá føroyingum, og tað er eitt stig á vegnum móti persónlagaðum medisini.

Les um altjóða humana tilvísingargenomið.