Humana tilvísingargenomið

Altjóða hava granskarar og onnur ment sonevnda humana tilvísingargenomið, sum kann sigast vera eitt altjóða miðalgenom fyri menniskjað. Humana tilvísingargenomið byggir á stórar nøgdir av dátum frá genomkanningum kring heimin, og tað verður dagført javnan, so hvørt sum fleiri dátur verða útvegaðar. Soleiðis fæst stigvíst ein betri fatan av, hvat er ”normalt”, og hvørjir íleguvariantar kunnu elva til sjúku. Humana tilvísingargenomið er eitt sera hent amboð hjá bæði granskarum og læknum.

Humana tilvísingargenomið hevur tó ta avmarking, at tað tekur ikki hædd fyri, at ymsir íleguvariantar hava ymsan títtleika, alt eftir hvar í heiminum tú ert. Ofta hava ávísir variantar nevniliga hópað seg upp gjøgnum fleiri ættarlið hjá búfjøldum í ávísum økjum, og eru vorðnir vanligir har. Eitt nú hava fólk í Norðurlondum nógvar felagsvariantar, meðan fólk í Afrika hava aðrar variantar í felag. Tí merkir eitt frábrigdi í mun til altjóða humana tilvísingargenomið ikki endiliga, at talan er um ein sjáldsaman og møguliga sjúkuelvandi variant, tí hesin varianturin kann vera heilt vanligur í einum ávísum øki.