Etiskar tvístøður

Genomvísindi og menningin av persónlagaðum medisini kann fáa stóran týdning fyri nógvar sjúklingar og fyri samfelagið sum heild, tí tað fer at vera gjørligt at málrætta viðgerðina í størri mun til tann einstaka. So slepst undan at brúka óneyðuga tíð og pening til viðgerð, sum ikki munar. Prísurin fyri hetta er, at tú og onnur gera tínar genomdátur tøkar til gransking.

FarGen 2 letur ikki luttakarum afturboðan um genomkanningarnar og viðger heldur ikki genomupplýsingar hjá luttakarum hvør sær, men í staðin verður hugt at, um til ber at staðfesta mynstur, sum kunnu ávísa sambond millum ílegur og sjúku. Kortini er talan um eina tøkni, sum fær til vega viðkvæmar persónsupplýsingar, og tá er etiska aspektið altíð viðkomandi. So er spurningurin, um vit sum einstaklingar, granskarar, læknar og samfelag eru til reiðar at lofta vitanini, sum genomkanningar kunnu útvega.

Niðanfyri kanst tú lesa um nakrar av etisku tvístøðunum, sum vitan um genomið kunnu elva til.

GG. FarGen 2 letur onga afturboðan um tínar genomkanningar, og granskarar hava bert atgongd til navnloyndar dátur. Tí eru dømini niðanfyri ikki beinleiðis viðkomandi fyri hesa verkætlanina, men verða tikin við fyri at vísa á viðkvæmið í genomupplýsingum.

Nakrar av tvístøðunum kunnu vera (trýst á fyri at lesa meira):

• Ognarrættur til íleguvitan
• Vandi fyri mismuni
• Nøring
• Hvar ganga mørkini
• Ílegupatent