FarGen-dátur í cloud-skipan

Komandi ár tekur Ílegusavnið í nýtslu nýggja AWS-skipan, sum er ein goymsluskipan í cloud. Tað merkir, at FarGen-dátur lutvíst verða fluttar yvir á hesa skipanina. Vit senda fráboðan um nýggju skipanina til allar okkara luttakarar, tí vit sambært Dátuverndarlógini eiga at kunna um, hvar og hvussu dátur verða goymdar.

Vit velja nýggju skipanina fyri at framtíðartryggja okkum við eini loysn, sum lýkur øll neyðug trygdarkrøv, samstundis sum hon er smidligari at arbeiða við hjá møguligum altjóða samstarvspørtum. Við hesum fylgja vit gongdini á økinum, sum er at nýta cloud-loysnir. Ílegusavnið er ein lítil stovnur, og henda skipanin ger, at vit kunnu brúka orku til at arbeiða við dátunum heldur enn at menna KT-loysnir.

AWS-skipanin, sum vit fara at nýta, er staðsett í Írlandi, og er sostatt fevnd av ES-trygdarkrøvum og GDPR-ásetingum. Øll gransking, sum Ílegusavnið er partur av, er eisini fevnd av Dátuverndarlógini við eitt nú ásetingum um vernd av persónupplýsingum. Fyri at granskarar skulu fáa atgongd til dátur í skipanini, krevst framvegis samtykki frá hvørjum einstøkum luttakara til hvørja verkætlan sær. Bert navnloyndar dátur verða tøkar í AWS-skipanini, og ongar dátur verða goymdar har, sum kunnu avdúka samleikan hjá einstaka luttakaranum.